Агропром

КАРЫСНАЕ МАЛАКО ТОЛЬКІ ЯКАСНАЕ, –

сцвярджаюць завадчане і прыкладаюць да гэтага ўсе намаганні. 

Чаму ў мінулыя выхадныя з гандлю была вернута партыя малака, вытворчасці ААТ “Лунінецкі малочны завод”, а многія малакавозы, якія дастаўлялі сыравіну з гаспадарак, не праходзілі далей за прахадную? Пытанні на гэтыя адказы атрымалі, пабываўшы на перапрацоўчым прадпрыемстве.

Без абавязковых атрыбутаў: белага халата, шапачкі і поліэтыленавых бахілаў трапіць у цэх, дзе вырабляецца малочная прадукцыя проста немагчыма. Як немагчыма абмінуць і спецыяльны дэзінфекцыйны апарат, які аўтаматычна адкрывае турнікет санпрапускніка ў адліваючы срэбрам цэх толькі пасля таго, як апрацуе вашы рукі дэзрастворам… Самой прадукцыі тут нябачна: аўтаматычна з бліскучых ёмістасцей яна трапляе ў фасовачную тару, якую прымаюць акуратныя работніцы ў белых халатах і складваць у скрынкі. Грузчыкі перавозяць яе ў вялізны халадзільны склад, адкуль малако, смятана, масла, кефір і ёгурт паступаюць у магазіны… Што адметна – на кожным этапе стэрыльная чысціня: сачыць за ёю пачынаюць, як толькі малакавоз трапляе на тэрыторыю завода. Тут, у сыравіннай лабараторыі кожную партыю малака правяраюць на наяўнасць нехарактэрных прадукту прымясяў і ўтрыманне радыенуклідаў. Не менш строгі кантроль сыравіна праходзіць і далей…

Як жа здарылася, што ў пятніцу, 13 сакавіка, партыя няякаснага малака з пахам антыбіётыкаў патрапіла на рэалізацыю ў гандлёвую сетку? Адразу “пасыпаліся” скаргі ад спажыўцоў. На прадпрыемстве вырашылі тэрмінова вярнуць неарэлізаваныя 5 тон малака і ўтылізаваць яго. У гандаль даставілі якасную прадукцыю, спажыўцам прапанавалі абмяняць раней набытае малако, а спецыялісты прыступілі да расследавання інцыдэнта. Аказваецца, антыбіётык не змаглі “ўлавіць” прымяняемыя на прадпрыемстве 5-хвілінныя тэсты. Яго “вылічыў” высокаадчувальны галандскі “Дэльватэст”, які ўмее “знаходзіць” ажно 27 антыбіётыкаў. Ведаючы, што на кон, акрамя прэстыжу прадпрыемства, пастаўлена самае дарагое – здароўе людзей, завадчане тэрмінова набылі неабходную колькасць новых тэстаў і раздалі іх у сельгаскааператывы, дзе правялі бясплатную вучобу сярод ветэрынарных работнікаў, лабарантаў і вадзіцеляў малакавозаў. Акрамя таго, у райвыканкаме сабралі кіраўнікоў гаспадарак, якім растлумачылі шляхі трапляння антыбіётыкаў у малако, запатрабавалі ўзмацніць кантроль ветэрынарных работнікаў за лячэннем хворых кароў, утылізацыяй атрыманага ад іх малака, і абавязалі трымаць сітуацыю на асабілівым кантролі. Цяпер кожная партыя сыравіны, якая паступае з гаспадарак, будзе суправаджацца дакументамі, пацвярджаючымі якасць. Завадчанам толькі застанецца пракантраляваць іх адпаведнасць. Двайная адказнасць стане яшчэ больш яскравым гарантам якасці.

Непасрэдна на заводзе ў мэтах бяспекі цэльнай прадукцыі днямі павялічылі тэмпературу пастэрызацыі малака з 76-ці да 85 градусаў па Цэльсію. За тры дні з моманту праверкі на новых тэстах, гаспадаркам раёна вярнулі 35 тон непрыгоднага да ўжывання малака. На гэтым пастаўшчыкі сыравіны страцілі 20 мільёнаў рублёў. Слухі наконт таго, што затаваранаму малочнаму заводу сёння нявыгадна закупляць малако ў гаспадарках, абверг дырэктар завода С.Ф. Карпец, які паведаміў, што з гаспадарак раёна штодзень паступае 130 тон малака, пры магутнасці перапрацоўкі 300 тон. Улічваючы няпоўную загрузку, вырашылі заключыць дагаворы на вытворчасць сухога абястлушчанага малака з давальніцкай сыравіны для Пінскага малочнага завода і ААТ “Брэстмарожанае”.  
Кіраўнік таксама паведаміў, што антыбіётык выяўляецца і ў малацэ, якое завод закупляе ў насельніцтва. Прычын шмат. Адна з іх – прымяненне мазяў для змякчэння “патрэскаўшыхся” саскоў. Гаспадыні часта прымяняюць іх перад дойкай, не задумваючыся, што антыбіётык трапляе непасрэдна ў вядро. 

На заводзе ўсё робіцца дзеля бяспекі спажыўца. І рэдкая непрадбачаная сітуацыя з’яўляецца толькі чарговым штуршком для далейшага ўдасканальвання тэхналогіі.  

Пацвярджэнне таму – затраты на рэканструкцыю вытворчасці і ўкараненне ў 2006-ым годзе міжнароднай сістэмы якасці СТБ ІСО-2001 на выпуск сухога абястлушчанага малака, а ў 2007-ым – і на масла сметанковае. Летась завадчане з гонарам вытрымалі расійскую ветэрынарную інспекцыю, якая пацвердзіла высокую якасць прадукцыі. Сёлета адкрылі для сябе новыя рынкі збыту ў Сірыі, Казахстане, Арменіі і Грузіі. Чакаецца атэстацыя ветэрынарнай службы з Украіны. Лунінецкая цэльнамалочная прадукцыя па-ранейшаму карыстаецца заслужаным попытам у жыхароў Мінска, Брэста, Пінска і Бабруйска. Смачны лунінецкі тварог вялікімі партыямі закупляе ААТ “Санта-Брэмар” для вырабу варэнікаў.

Нягледзячы на ўскосную віну, кіраўніцтва прадпрыемства прызнае дапушчаныя пралікі, прыносіць прабачэнні спажыўцам і запэўнівае, што засёўды будзе клапаціцца пра здароўе людзей, захоўваючы высокую якасць вырабляемай прадукцыі.



Показать больше

Похожие статьи

Кнопка «Наверх»
Закрыть
Закрыть