Агропром

Іванаў дзень даў старт жніву

Летні час для працаўнікоў вёскі заўсёды звязаны з напружанай працай. Рана паднімацца, позна класціся спаць для маладых хлопцаў і дзяўчат – вельмі хутка становіцца прывычнай справай. Таму магчымасць на Купалле адпачыць дружным калектывам у СВК “Чучавічы” ўспрынялі прыязна. Напярэдадні гуляння актывісты пярвічак БРСМ і ГА “Белая Русь” паклапаціліся аб арганізацыі прыгожага кастра, музыкі і смачных пачастункаў.
Бліжэй да апоўначы хлопцы і дзяўчаты разам з бацькамі, роднымі і знаёмымі сабраліся ля вогнішча. Іх вясёлыя песні, задорныя пляскі ўсю ноч гучалі над любімай і роднай вёскай…

А раніцай калектыў працаўнікоў згуртавала яшчэ адно свята – Зажынкі. Свяшчэннаслужыцель Пакроўскай царквы Уладзімір Тарчыла асвяціў збожжаўборачную тэхніку. Выстраеная ў рад, яна, здавалася, толькі і чакала каманды “Наперад!”. Першы зжаты сноп новага ўраджаю, які атрымаў у народзе званне “Багатыр”, па-традыцыі ўручылі старшыні гаспадаркі Сяргею Богушу. А ці ведаеце, што азначае чырвоная стужка, якая апаясвае сноп – гэта сімвал любові лю-дзей да роднай зямлі. Выцягнеш адзін каласок – сноп паслабее. Вось так і людзі. Дык няхай наш калектыў заўсёды будзе моцным і з’яднаным!
Кожнаму з удзельнікаў сёлетняга жніва дзяўчына ў нацыянальным адзенні ўручыла сувеніры з беларускай сімволікай і арнаментам. Няхай яны заўсёды нагадваюць нам, што ўсе мы дзеці самай прыгожай і светлай краіны – Беларусі.
Успомнілі і пра ветэранаў, пра іх важкі ўклад у сённяшні дабрабыт гаспадаркі. За актыўны ўдзел у жыцці калектыву ветэрану працы, неаднаразоваму пераможцы спаборніцтва на жніве Сяргею Іванюку ўручылі падзячны ліст. Спецыяльныя вымпелы атрымалі мінулагоднія лідары на жніве – экіпаж камбайна “Акрос-530” у складзе Сяргея Гаргуна і Валерыя Арашкевіча і вадзіцель аўтамабіля МАЗ-551-605 Мікалай Шчатко.
Іванаў дзень даў старт важнейшай сельскагаспадарчай кампаніі года – жніву ў СВК “Чучавічы”, у гонар чаго ўзнялі сцяг. Механізатары віншавалі адзін другога з пачаткам гарачай пары, і з веданнем справы жадалі чыстага неба і ясных сонечных дзён. Пасля гэтага камбайны дружна накіраваліся ў поле, а актывісты пярвічкі прыступілі да афармлення інфармацыйнага кутка “Гарачыя дні”, дзе будуць адлюстраваны самыя памятныя моманты кампаніі.
Алена МУРАВЕЙКА, спецыяліст  па ідэалагічнай  рабоце СВК “Чучавічы”.

Показать больше

Похожие статьи

Кнопка «Наверх»
Закрыть
Закрыть