Агропром

Наступны рубеж — 6-тысячны!

6 тысячники

Філіял «Лобчанскае» ААТ «Лунінецкі малочны завод» у канцы мінулага года адзіны сярод сельгаспрадпрыемстваў раёна стаў 5-тысячнікам па надоях малака.

У гаспадарцы дзве малочнатаварныя фермы. Лобчанская №1 – гэта сучасны жывёлагадоўчы комплекс, дзе на беспрывязным утрыманні знаходзяцца 782 каровы. Даенне іх вядзецца ў даільных залах з камп’ютарным абсталяваннем.  Як расказала загадчыца комплексу Галіна Самандык, упершыню запаветнай лічбы – 5086 кілаграмаў малака ў разліку на ўмоўную галаву – яе калектыў дасягнуў летась. Сёлета свой вынік павялічылі яшчэ на 50 кілаграмаў. Лічба, на першы погляд, здаецца невялікай, аднак за ёю крыецца нястомная работа ўсяго калектыву гаспадаркі. Стараліся ўсе: корманарыхтоўшчыкі клапаціліся пра запасы корму, жывёлаводы своечасова даглядалі пагалоўе і прыбіралі за ім, спецыялісты сачылі за здароўем, асемянатары пакрывалі кароў і цялушак. У той жа час самая важная ў гэтым ланцужку роля ўсё ж адводзіц-ца аператарам машыннага даення. Іх на комплексе восем. Працавітыя, акуратныя і добрасумленныя, яны старанна выконваюць сваю справу, прытрымліваючыся строгай тэхналогіі. У выніку асноўная маса надоенага на працягу года малака (а гэта больш як 3958 тон) адпавядае класу экстра.

Напярэдадні новага года сваіх калег дагналі і аператары МТФ №2 у Дубаўцы (на здымку), якую ўзначальвае Валянціна Евенка. Тут умовы крыху іншыя: 218 кароў утрымліваюцца на прывязі, даенне вядзецца з выкарыстаннем малакаправода, аднак якасць малака таксама добрая. З надоеных больш як 1090 тон 96 працэнтаў залічана класам экстра і вышэйшым гатункам.

Падводзячы рысу пад поспехам, галоўны заатэхнік Мікалай Ляўданскі адзначыў, што на выніках работы фермаў найперш адбілася кармавая база. Дзякуючы стварэнню насычанай бабовымі культурамі сенажацей і пашы, удалося значна павялічыць летнія надоі і трымацца на годным узроўні пазней. Усяго на зімова-стойлавы перыяд назапашана кармоў 30,3 цэнтнера кармавых адзінак на ўмоўную галаву. Нельга недаацэньваць і спецыялістаў, якія вялі мэтанакіраваную работу па аднаўленню статка, сачылі за выкананнем тэхналогіі на розных узроўнях.

Высокі вынік лобчанскіх жывёлаводаў не застаўся без увагі кіраўніцтва раёна.

Павіншаваць калектывы прыехалі ў гаспадарку прадстаўнікі райкама прафсаюза работнікаў АПК і райсельгасхарчу. Кіраўнік філіяла Міхаіл Ільючык, спецыялісты і жывёлаводы іх сустракалі на малочнатаварным комплексе ў Лобчы, упрыгожаным з нагоды калядных святаў ёлачкай з вясёлымі рознакаляровымі агеньчыкамі, што надавала асаблівы святочны настрой. А замацавалі яго ў далейшым віншаванні з нагоды перамогі, падзякі за працу, пажаданні дасягнуць яшчэ большых поспехаў і, зразумела ж, каштоўныя падарункі, якія атрымалі для сваіх калектываў загадчыкі фермаў.

Теги
Показать больше

Похожие статьи

Кнопка «Наверх»
Закрыть
Закрыть