Я не працую па стану здароўя, але не з’яўляюся ні інвалідам, ні пенсіянерам. Аднак пры гэтым афіцыйна па дагаворы найму здаю кватэру і штомесяц плачу падаходны падатак. Ці павінен буду плаціць падатак за “дармаедства”?

Адказвае галоўны дзяржаўны падатковы інспектар аддзела падаткаабкладання фізічных асоб ІМПЗ па Лунінецкім раёне Кацярына ПЛЯЦЮК:

— У адпаведнасці з пунктам 3 Дэкрэта Прэзідэнта Рэспублікі Беларусь ад 02.04.2015 г. “Аб папярэджанні сацыяльнага ўтрыманства” ад уплаты збору на фінансаванне дзяржаўных выдаткаў вызваляюцца асобы, якія ўплацілі падаходны падатак з фізічных асоб за адпаведны падатковы перыяд у памеры не менш як 20 базавых велічынь. Калі гэта сума менш, то давядзецца даплаціць. Напрыклад, грамадзянін на працягу 2015 года здаваў унаём аднапакаёвую кватэру ў Лунінцы і ўплаціў падатак у фіксаванай суме ў памеры 1 мільён 5 тысяч рублёў. Збор за 2015 год складае 3 мільёны 600 тысяч пры базавай велічыні ў 180 тысяч рублёў. Такім чынам, у гэтым выпадку грамадзяніну давядзецца зрабіць даплату ў суме 2 мільёны 595 тысяч рублёў.