Бабуля… Колькі цёплых, пяшчотных, добрых успамінаў, асабліва  з дзяцінства, выклікае ў большасці з нас гэта прыгожае слова! А якім цярпеннем, мудрасцю, аптымізмам, энергіяй і талентамі адрозніваюцца прадстаўніцы прыгожай паловы чалавецтва, што носяць такое ганаровае і паважанае званне! Сведкамі ўсяго гэтага сталі гледачы конкурснай шоу-праграмы «Супербабуля-2016» сярод працаўніц РУВП «Граніт». Яна прайшла ў мінулыя выхадныя ў Палацы культуры прадпрыемства.

Прадпрымальных і актыўных бабуль ацэньвала журы пад старшынствам кіраўніка прафкама «Граніта» Таццяны Гарбенка. Дарэчы, менавіта гэта аб’яднанне стала ініцыятарам і фундатарам яркага і эфектнага конкурсу. Гледачы таксама мелі магчымасць выказаць свае меркаванні з дапамогай спецыяльнага купона для галасавання. Святочную атмасферу выхаднога дня падтрымлівалі Ілья Капліч, Эрыка Дземідовіч, Ксенія Калошыц, дзіцячы харэаграфічны ансамбль «Эдэльвейс» і іншыя артысты Палаца культуры. Іх нумары запоўнілі паўзы паміж турамі, дорачы гледачам шмат радасці і аптымізму.

У змаганнях удзельнічалі пяць канкурсантак. Інжынер тэхнічнага аддзела Лідзія Рашэцкая – бабуля дваіх унукаў, для якіх з задавальненнем у вольны час вяжа абноўкі. Тры з паловай дзесяцігоддзі аддала «Граніту» электраманцёр Святлана Таболіч: яна дапамагае выхоўваць сваім дзецям трох хлапчукоў і дзяўчынку. Аб тым, каб ва ўнучак Аляксандры і Арыны з’явіліся браты, марыць бухгалтар Вера Чырец. Для начальніка бюро па заработнай плаце Алены Ефімовіч няма лепшай падставы для радасці, чым збор у бацькоўскім доме адразу ўсіх членаў яе вялікай сям’і, уключаючы самых маленькіх. Імкненне да здаровага ладу жыцця ў малодшых прадстаўнікоў роду – Мілены, Данііла і Кірыла – падтрымлівае машыніст крана Галіна Пракаповіч.

Традыцыйную «Візітоўку» ў гэтай шоу-праграме ўзялі на сябе ўнукі канкурсантак, выкарыстаўшы відэаролікі і фатаграфіі з дамашняга архіва, а яшчэ песні і вершы. Стылістамі з добрым густам прадэманстравалі сябе працаўніцы ў туры «Салон прыгажосці», за нядоўгі час яны стварылі арыгінальныя прычоскі мадэлям. Дружнымі апладысментамі падтрымлівалі гледачы ўдзельніц падчас «Паветранага Дартса». А вось стравы, прадстаўленыя ў «Кулінарным паядынку», маглі б стаць упрыгожваннем любога святочнага стала. Здзівілі бабулі ў конкурсе «Хто на што здатны!»: жанчыны калясілі па сцэне на веласіпедзе і ролікавых лыжах, круцілі гімнастычны абруч, спрытна скакалі на скакалцы… Не менш задавальнення падарыла дэфіле ў вячэрніх сукенках, а таксама канцэртныя нумары, у якіх удзельніцы паспрабавалі максімальна прадэманстраваць свае здольнасці.

Па меркаванню журы, па-за канкурэнцыяй быў артыстызм Святланы Таболіч. Званне «Самая элегантная бабуля» дасталася Лідзіі Рашэцкай. Ніхто не змог выстаяць перад абаяннем Галіны Пракаповіч, у тым ліку – гледачы, большасць з якіх аддалі гэтай гараджанцы свае сімпатыі. Самай сучаснай бабуляй зарэкамендавала сябе Алена Ефімовіч. Галоўны тытул «Супер-бабуля-2016» заваявала Вера Чырэц.