Каларыт народнага карнавалу запомніўся жыхарам Вулькі 1 і гасцям аграгарадка, дзе на Стары Новы год прайшоў “Калядны фэст-2017”.

На пляцоўцы перад мясцовым Цэнтрам культуры і народнай творчасці стаяла прыгожа ўбраная сцэна ў выглядзе вясковай хаты. Галоўныя героі – Лявон і Лявоніха (іх ролі ўдала выканалі Віктар Барысевіч і Вольга Мелюх) – з гумарам і жартамі дэманстравалі падрыхтоўку да сустрэчы каляднікаў. Дапамагала ім Аленка (Крысціна Курадавец). Разам яны расказалі, адкуль пайшла назва “Шчодры вечар”, якія пачастункі спецыяльна гатавалі гаспадыні да свята, па якіх прыкметах вызначаўся будучы ўраджай. А потым, як і належыць у чароўную пару, адбываліся цікавыя здарэнні з удзелам Чорта (у персанажа пераўвасобіўся Валерый Брэзін), Зюзі (Ігар Мігалевіч), Зімы (Іна Гоман), Вядзьмаркі (Наталля Лабко). Шматлікія каляднікі ў сваіх абрадах паказвалі асаблівасці святкавання на іх малой радзіме.

Цікавымі выступленнямі парадавалі самадзейнікі з Вулькі 1, Лунінца, Палескага, Луніна, Язвінак, Лобчы, Багданаўкі, Дзятлавіч і інш. Акрамя таго, усе жадаючыя змаглі пачаставацца ласункамі: кожны калектыў СДК прыгатаваў смачныя стравы. Прыгожыя вітанні адрасавалі землякам вядучыя – Алена Корчык і Таццяна Краўчук. Музычна аздобілі праграму народныя аматарскія аб’яднанні “Жывіца” і “Світанак”, вакальны ансамбль “Весніца”, фальклорны калектыў “Крынічанька ” і народны ансамбль песні “Вандроўнікі”. Па выніках “Каляднага фэсту-2017” дыпломамі аддзела ідэалагічнай работы, культуры і па справах моладзі райвыканкама заахвочаны ўсе ўдзельнікі тэатралізаванага прадстаўлення.