Гаспадарскі падыход дэманструюць жыхары вёскі Дрэбск, якія наводзяць чысціню ды парадак на зямлі. 

Стараста населенага пункта Мікалай Германовіч натхняе землякоў на добрыя справы. Яшчэ не паспела вясна ўступіць у свае паўнамоцтвы, а тут ужо правялі з дзясятак суботнікаў. Аб’ём работ, якія выканалі талакой вяскоўцы, уражвае.

– Вялікі дзякуй усім, хто, не лічачыся з уласным часам, далучаецца да агульнай справы па добраўпарадкаванні тэрыторыі Дрэбска, – гаворыць Мікалай Міхайлавіч. – Удзячны начальніку ДРБУ-101 Аляксандру Трухнову, які падтрымаў нашу ініцыятыву па навядзенні парадку на прылягаючай тэрыторыі да дарогі, якая вядзе на Цну. Працавалі сумесна з дарожнікамі, выразалі сухастой, хмызняк, прыбралі смецце. Наваколле адразу змянілася, стала больш прывабным. Шмат было зроблена і па добраўпарадкаванні мясцовых могілак, спілавалі ўсе старыя, аварыйныя дрэвы, таксама выдалілі зараснікі акацыі. Месца спачыну нашых продкаў павінна выглядаць належным чынам – гэта наш святы абавязак.

Стараста расказаў, што ў цэнтры вёскі плануецца стварыць сквер у гонар Вялікай Перамогі савецкага народа над нямецка-фашысцкімі захопнікамі. Тэрыторыя пад яго закладку ўжо падрыхтавана. Адзначана, што істотную дапамогу тэхнікай аказала кіраўніцтва сельгаспрадпрыемства “Гарадоцкі” і чыгуначнікі. Засталося толькі набыць саджанцы і пасадзіць дрэўцы, каб праз пэўны час зазелянелі яны маладой лістотай, упрыгожыўшы Дрэбск.

– Работы па навядзенні парадку і далей будуць працягвацца, – канстатуе Мікалай Германовіч. – Спраў хапае. Галоўнае, што землякі падтрымліваюць, далучаюцца да агульнай справы, а талакой многае можна зрабіць.  

Далучайцеся да нашага канала ў Telegram