Адпраўка грамадзян Беларусі, прызваных на тэрміновую ваенную службу ў злучэнні і воінскія часці Узброеных Сіл, унутраных войск Міністэрства ўнутраных спраў, органаў пагранічнай службы і дзяржаўнай бяспекі пачнецца з 26 красавіка.

Усяго на ўкамплектаванне Узброеных Сіл, іншых войск і воінскіх фарміраванняў Беларусі ў красавіку-маі плануецца накіраваць каля 10 тысяч чалавек. У першы дзень у войскі накіруюцца каля 1 тысячы прызыўнікоў, якія папоўняць рады сіл спецыяльных аперацый, 72-га аб’яднанага навучальнага цэнтра падрыхтоўкі прапаршчыкаў і малодшых спецыялістаў і Мінскай ваеннай камендатуры.

Першакурснікі ВНУ сельскай гаспадаркі, якія маюць права на адтэрміноўку ад прызыву для працягу адукацыі, па сваім жаданні могуць быць прызваны на службу ў рэзерве. Яе праходжанне прадугледжана падчас канікул.

Цырымонія прыняцця ваеннай прысягі ў новапрыбыўшага папаўнення ў злучэннях і воінскіх часцях Узброеных Сіл адбудзецца 20 мая.

Таксама своечасова ў красавіку-маі пройдзе і звальненне ў запас ваеннаслужачых, якія выслужылі ўстаноўленыя тэрміны тэрміновай ваеннай службы.

Нагадаем, што прызыў грамадзян на тэрміновую ваенную службу, службу ў рэзерве ў лютым-маі праходзіць у адпаведнасці з Указам Прэзідэнта Рэспублікі Беларусь ад 24 студзеня 2023 г. №19.

«Гэтая прызыўная кампанія праходзіць без якіх-небудзь асаблівых змяненняў, – удакладніў ваенны камісар Лунінецкага і Ганцавіцкага раёнаў Уладзімір Кахавец. – Завершана планавая работа прадстаўнікоў вайсковых часцей па ўсебаковым вывучэнні і прафесійным псіхалагічным адборы прызыўнікоў. Каля васьмідзесяці юнакоў з 26 красавіка па 5 мая адправяцца на службу ў злучэнні і воінскія часці Узброеных Сіл, іншыя войскі і воінскія фарміраванні Беларусі».

Далучайцеся да нашага канала ў Telegram