Да пачатку новага навучальнага года застаецца не так многа часу. Вядома, што сабраць дзіця ў школу – не вельмі танная справа.

Не ва ўсіх бацькоў хапае сродкаў, каб набыць усё неабходнае для вучобы. Каб дапамагчы малазабяспечаным сем’ям, тэрытарыяльны цэнтр сацыяльнага абслугоўвання насельніцтва праводзіць дабрачынную акцыю “Збяры дзіця ў школу”.

Разам з раённай арганізацыяй ГА “Белая Русь” падрыхтавалі падарункі 25 дзеткам, што выхоўваюцца ў 10 сем’ях. Па адрасах накіраваліся разам з псіхолагам Людмілай Буневіч і спецыялістам па сацыяльнай рабоце Юліяй Ананчыкавай. Прыемна было бачыць шчаслівыя твары дзяцей, у іх ліку чацвёртакласніца Дашанька ТКАЧУК (на здымку). А значыць, справа, якую робіць тэрытарыяльны цэнтр, – сапраўды патрэбная.