Калі на скрыжаванні каля Сінкевіч спыніўся аўтамабіль ДАІ, вадзіцелі, магчыма, падумалі, што адбылося ДТЗ. Убачыўшы бацюшку ў расе і супрацоўнікаў Дзяржаўтаінспекцыі, верагодна, зусім спалохаліся.
Аказалася, на трасе свяшчэннаслужыцель акрапляў святой
вадой самыя неспакойныя ўчасткі дарогі.
– У апошні час у раёне аварыі перасталі быць рэдкасцю, – расказвае старшы інспектар Андрэй Канапацкі. – З пачатку года ў нас загінула 6 чалавек (8 – летась).
Мясцовыя праваахоўнікі вырашылі, што так больш не можа працягвацца, і звярнуліся за дапамогай да свяшчэнніка. Настаяцель храма ў гонар іконы Божай маці «Взыскание погибших» іерэй Сергій Крышталь уважліва выслухаў вартавых правапарадку, узяў з сабой святую ваду, малітоўнік і праехаў па раённых дарогах, спыняючыся на самых аварыйных скрыжаваннях. Бацюшка нагадаў, што, узносячы малітвы за здароўе і бяспеку ўсіх удзельнікаў дарожнага руху – як тых, хто забяспечвае кантроль, так і тых, хто адпраўляецца ў дарогу, – мы просім аб міласці Госпада, заслужыць якую можам добрымі справамі, любоўю і павагай да бліжняга.
Усяго на трасе Кобрын-Гомель былі асвячаны перакрыжаванні непадалёк ад Сінкевіч, Рэдзігерава, Любані і Бараўцоў, а таксама ўчастак дарогі каля аўтастанцыі, дзе ў страшнай аварыі гэтай зімой загінулі два чалавекі. Спа-дзяемся, што цяпер новых жалобных вянкоў на абочынах дарог не будзе.