КАМФОРТ: НЯТАННА, АЛЕ ВЕЧНА
Невялікая зала Дрэбскага СДК з цяжкасцю змясціла амаль сотню вяскоўцаў, якія прынялі ўдзел у сельскім сходзе.
Старшыня Гарадоцкага сельвыканкама Дзям’ян Бірыла заклікаў жыхароў да навядзення санітарнага парадку на падворках і вуліцах. Звернута асаблівая ўвага на ўборку могілак, недапушчальнасць утварэння несанкцыянаваных сметнікаў. Шмат пытанняў выклікала абмеркаванне плануемай газіфікацыі вёскі. Яна можа пачацца ў 2012 годзе пры ўмове стварэння кааператыва індывідуальных забудоўшчыкаў (магчыма, і двух, згодна з часткамі паселішча, – да чыгункі і пасля яе). Як вядома, Дрэбск не адносіцца да тэрыторый, жыхары якой маюць права на льготы пры пракладцы магістральнага газаправода. Усе расходы – ад праектна-каштарыснай дакументацыі да аплаты працы старшыні і бухгалтара КІЗа – будуць ажыццяўляцца за кошт насельніцтва. Як вядома, у гэтых мэтах жыхары працаздольнага ўзросту могуць скарыстацца льготным банкаўскім крэдытам.
Для роздуму над прапановамі дадзена прыкладна тры месяцы, каб прыняць рашэнне на чарговым сходзе.
