“ВЕРБАЧКА” НЕ ПАДУЛАДНА ЧАСУ

40-годдзе стварэння адсвяткаваў яслі-сад №3, які з чэрвеня 2010-га стаў дашкольнай установай раённага аддзела адукацыі.

Дагэтуль “Вербачка” належала Беларускай чыгунцы і захавала трывалыя сувязі з прадпрыемствамі вузла. Да адметнай даты прадстаўнікі станцыі Лунінец, лакаматыўнага дэпо і дыстанцыі пуці ўручылі калектыву вельмі неабходныя падарункі. Самую ж істотную дапамогу – каля 100 мільёнаў рублёў – аказаў раённы аддзел адукацыі. За лета здолелі адрамантаваць цеплатрасу ў першым корпусе, добраўпарадкаваць фасад, набыць новае тэхналагічнае кухоннае абсталяванне. Дзякуючы выдзеленым сродкам, адкрыта дадатковая група. 40-годдзе дашкольнай установы адзначалі 220 дзяцей, якія выхоўваюцца ў ясельных (2), лагапедычных (2), санаторных (2) і групах агульнага развіцця (4), рыхтуюцца да школы ў двух класах. З 62-ух работнікаў калектыву, уключаючы 27 педагогаў, трэцяя частка працуюць 25 і больш год. У ліку іх – выхавальніца Наталля Адамаўна Баброва і прыбіральшчыца Вольга Іванаўна Крывулец, якія аддалі “Вербачцы” па 30 год працы.Начальнік аддзела адукацыі Валянціна Ігнатаўна Верас і старшыня райкама галіновага прафсаюза Нэлі Анатольеўна Рафаловіч уручылі Ганаровыя граматы 16-ці самым адказным і старанным працаўніцам. Абмежаванасць актавай залы дазволіла запрасіць на ўрачыстасць толькі работнікаў, якія сталі пенсіянерамі на працягу апошніх пяці год. Першай загадчыцай яслі-сада №3 у снежні 1970-га была Ларыса Апанасаўна Румянцава. З 1978 года калектыў узначальвала Валянціна Іванаўна Пліс, з 2001-га – Святлана Аляксееўна Баярчук. Дарэчы, абедзьве ў свой час узнагароджаны ганаровым знакам “Выдатнік Беларускай чыгункі”. Больш як ста ветэранам працы самыя шчырыя словы ўдзячнасці адрасавала цяперашняя загадчыца Ала Мікалаеўна Прыбаровіч. – Будзем працягваць традыцыі калектыву, – адзначыла яна. – Адна з самых важных – трывалыя сувязі дашкольнай установы з бацькамі. Ад папячыцельскага савета матэрыяльную падтрымку святу аказала прадстаўнік фермерскай гаспадаркі Валянціна Паўлаўна Навіцкая. Школьніцамі сталі былыя выхаванцы – дзеці Генадзя Георгіевіча Канапацкага, але і цяпер кіраўнік ПТУП “Еўрарэйс” адгукаецца на нашы просьбы. Шчодры падарунак атрымала “Вербачка” ад ПВУП “Вікторыя” – сертыфікат на суму 3 мільёны рублёў, які ўручыла дырэктар прадпрыемства, дэпутат Брэсцкага аблсавета Таццяна Дзмітрыеўна Удавенка. Толькі сем месяцаў узначальвае яслі-сад №3 Ала Мікалаеўна. Яна ўдзячна за кансультацыйную і арганізацыйную дапамогу свайму былому кіраўніку – загадчыцы яслі-садка №12 Таццяне Аляксееўне Шпак, якая шчыра віншавала калег. Такія ж сардэчныя вітанні і музычны падарунак адрасавалі базавай установе прадстаўнікі СШ №1 г. Лунінца. Разам з Дзедам Марозам і Снягуркай віноўнікі ўрачыстасці затушылі 40 свечак на святочным торце. Пры падтрымцы надзейных сяброў калектыў “Вербачкі” пачаў упэўнены крок да чарговага юбілею.

Аляксандр МАТОР, старшыня прафкама лакаматыўнага дэпо Лунінец.

Показать больше

Похожие статьи

Кнопка «Наверх»
Закрыть
Закрыть