ХЛЕБ УБІРАЦЬ, ДЫК РАЗАМ!
За тры дні жніва Ў СВК “Хваецкае” экіпажы камбайнаў у складзе Івана Лемяшэўскага і Пятра Лазько, Васіля Мелюха і Сяргей Кіндрука абмалацілі рапс са 180-гектарнай плошчы. Намалочаныя 255 тон зерня своечасова перапрацавалі.
Гэтак жа арганізавана пачалі і абмалот азімага жыта. На прасторнай 103-гектарнай ніве знайшлося месца для адначасовай работы ўсім наяўным у гаспадарцы чатыром экіпажам камбайнаў. Акрамя вышэй названых за штурваламі працуюць Васіль Дуньчык з сынам Васілём і Аляксандр Дударга з Сяргеем.
Асабліва адметным сёлетняе жніво стала для хлебаробаў ДУДАРГАЎ. Яно ў першае, як і новы камбайн.
– У гаспадарцы працую больш за 30 год. За гэты час 24 сезоны выводзіў у поле сваю “Ніву”, пакуль яна зусім не зламалася. Затым быў 4-гадовы перапынак у хлебаробскай справе. Выязджаў толькі на хімапрацоўку пасеваў. Здаецца, чакаў пакуль падарсце малодшы сын, – з усмешкай расказвае Аляксандр Уладзіміравіч. – Сёлета Сяргей закончыў вучобу ў каледжы сельгасвытворчасці, дзе набыў спецыяльнасць трактарыста-машыніста і прыйшоў працаваць у “Хваецкае”. Нам і даверылі новы камбайн. Жыта жнем пакуль разам, вывучаем тэхніку і яе магчымасці.
Пажадаўшы экіпажу поспехаў, з галоўным аграномам гаспадаркі Аляксандрам Свібовічам рушылі на зернеток. Менавіта тут сканцэнтравана асноўная маса намалочанага зерня. Як і чакалі, работа ішла поўным ходам. Старшы аператар Міхаіл Мікуліч і аператар Антон Багданец італьянскай сушыльна-ачышчальнай машыны пільна сачылі за яе маніторам і своечасова адгортвалі ад яе адыходы збожжа:
– Вядома, з поля жыта паступае не зусім чыстае з вільготнасцю 18-19 працэнтаў. Наша задача ачысціць яго і дасушыць да 12 працэнтаў, – уводзіць у курс спраў Міхаіл Барысавіч. – Мы з напарнікам – пенсіянеры. Выходзім дапамагаць гаспадарцы толькі на час жніва. І “калгасу” добра, і нам дадатковы заробак не пашкодзіць.
Такой жа думкі прытрымліваюцца і 10-класнікі мясцовай школы Дзяніс Кіндрук, Максім Дударга і Павел Шуляк, якія дапамагаюць дарослым на зернетаку. Летась яны таксама тут працавалі. Спадабалася.
У цэлым сушыльная гаспадарка ў “Хваецкім” уражваючая – ажно 4 сушылкі. Калі іх адначасова запусціць у работу, то за светлавы дзень можна дапрацаваць 150 тон зерня пры сённяшняй вільготнасці. А намалоты чакаюцца неблагія. Да ўборкі належаць больш як тысяча гектараў збожавых і зернебабовых культур.
Адметна, што з першых дзён жніва ў гаспадарцы прыступілі да продажу збожжа дзяржаве. На ўчарашні дзень на Лунінецкі ўчастак Пінскага КХП даставілі больш як 40 тон адборнага жыта.
