Хачу ведаць…

…чаму аўтобусны рух зручны для аўтапарка, а не для пасажыраў?

Пераканаўча просім разабрацца ў бязладдзі, што творыцца ў аўтапарку №10. Маршрутныя аўтобусы, якія курсіруюць у райцэнтры,  пастаянна  спазняюцца,  асабліва на маршруце №6. Нярэдка здараецца, што аўтобусы на лініі псуюцца, і тады пасажырам даводзіцца як папала дабірацца. У той жа час транспарт іншых маршрутаў ідзе ў парк паражняком і ніколі не забірае пасажыраў з  сапсаваўшагася аўтобуса.

Далёка не на ўсіх маршрутах аб’яўляюць прыпынкі. Вокны такія брудныя, што не заўсёды бачна, дзе едзеш. Нязручна гэта для гасцей, якія не ведаюць горада.

Не задавальняе і практыка, калі за 1 прыпынак да канцавой,   скажам,  ад “Ашчаднага банка” да “Вакзала”, людзям трэба браць білет, а каля вакзала, нягледзячы на тое, што яны едуць па маршруце далей, выходзіць з аўтобуса, каб зноў потым плаціць за праезд.

Для зручнасці жыхароў вельмі патрэбен і прыпыначны пункт каля СШ №1, але пажаданняў нашых кіраўніцтва аўтапарка №10 чамусьці не чуе.

Жыхары вуліц Пнішча, Касцюшка, Вішнёвая, Ровенская, Ціхая, Неўскага, Ясеніна, Гогаля, ускраіны Чырвонаармейскай і іншых.

Звяртаюцца жыхары шматпакутнай вёскі Лугі.

Пасля ўпарадкавання аўтобусных зносін грамадскі транспарт стаў хадзіць у нашу вёску так, каб зручна было аўтапарку, а не людзям. Дабрацца ў райцэнтр ці цэнтральную сядзібу сельсавета можна раніцай,  а выехаць адтуль – толькі позна вечарам. Дзе  старому чалавеку (а такіх большасць у Лугах) бавіць цэлы дзень?

Адказвае дырэктар філіяла “Аўтамабільны парк №10 г. Лунінца” ААТ “Брэстаблаўтаранс” Сяргей КІНДРУК:

– Спецыялістамі райвыканкама разам з кіраўніцтвам аўтапарка праведзена работа па праверцы выкладзеных у лісце прэтэнзій. Графік руху аўтобусаў іншы раз парушаўся ў час зімовага бездарожжа. Зараз расклад на ўсіх маршрутах строга захоўваецца. Што датычыць псавання аўтобусаў, то на лінію ўсе яны выходзяць спраўнымі, аднак гэта – тэхніка, і прадугледзець раптоўныя паломкі немагчыма. Горад наш не такі і вялікі і ў выпадку паломкі аўтобуса складанасці дайсці да наступнага прыпынку, дзе можна перасесці на іншы маршрут, асаблівай няма. Адлегласць паміж прыпынкамі ў сярэднім не перабольшвае 400 метраў.

Разам тлумачым пасажырам, што гукавыя інфарматары абвяшчэння аўтобусных прыпынкаў устанаўліваюцца заводам-вытворцам. У аўтапарку – два такія аўтобусы. Дзейнічаюць яны на маршрутах №№1, 2, 4, 5. Даабсталяваць астатні  транспарт неабходнай гукавой тэхнікай самастойна магчымасці не маем.

Транспарт прыбіраецца і мыецца рэгулярна. Аднак, улічваючы скаргі пасажыраў, кантроль за гэтым зробім больш пільным.

Перавозка пасажыраў рэгламентуецца пунктам 220 адпаведных Правілаў. Згодна з імі “пасажыр абавязаны набыць праязны білет да наступнага прыпынку, а пасля таго, як аўтобус прыбудзе на канцавы, пакінуць салон транспартнага сродка”.

Адкрыць прыпынак каля СШ №1 не дазваляюць тэхнічныя магчымасці. Там дастаткова складанае перакрыжаванне і дадаткова ўскладняць дарожную сітуацыю недаравальна. Тым больш, што непадалёк – каля ашчаднага банка і магазінаў на Чырвонаармейскай – ужо ёсць аўтобусныя прыпынкі.

Што датычыць транспартных зносін з Лугамі, то вёска адносіцца да населеных пунктаў, дзе больш як 30 двароў. Па нарматывах тут павінна быць не менш як 8 рэйсаў у тыдзень. Гэты нарматыў вытрымліваецца. Разам з тым, улічваючы просьбу жыхароў, лічым мэтазгодным з 20 мая 2013 года ўнесці змяненні ў расклад аўтобуснага руху. Замест ліквідуемага прыгараднага маршрута “Лунінец-Лугі” адпраўленнем у 19-25 па панядзелках, серадах і суботах будзе працягнуты да названай вёскі маршрут “Лунінец – М. Чучавічы” адпраўленнем з райцэнтра ў 15-25.