На чарговым пасяджэнні раённага выканаўчага камітэта, якое правёў яго старшыня Васіль Агіевіч, першым было разгледжана пытанне эфектыўнасці племянной работы.

Сёння ніхто не ставіць пад сумненне выснову, што развіццё малочнай жывёлагадоўлі і павышэнне прадуктыўнасці кароў напрамую залежаць ад дакладнай арганізацыі аднаўлення статка, строгага захавання тэхналогіі кармлення і ўтрымання рамонтных цялушак. Як жа абстаяць з гэтым справы ў нашым раёне?

Па словах намесніка старшыні райсельгасхарчу Алега Багука, сітуацыя дастаткова складаная. Больш таго, у некаторых гаспадарках яскрава прасочваецца заганная тэндэнцыя зніжэння выхаду цялят у разліку на 100 кароў. За студзень-люты ў раёне атрымана 2677 цялят, што на 71 менш, чым летась. Агрэхі ў племянной справе не замарудзілі адмоўна адбіцца на вытворчасці малака. Прыкметна менш у параўнанні з леташнім атрымліваюць яго па гэтай прычыне ў КУП “Міжлескае” і СВК “Гарадоцкі”. Павялічылася колькасць ялавых кароў у СВК “Багданаўка”, “Дзятлавіцкі”, “Чучавічы”, “Новае Палессе”, “Вулькаўскі світанак”, “Велута”, філіяле “Аграграніт”. Звярнуў увагу выступаючы і на парушэнні ў кармленні і ўтрыманні сухастойных кароў.

Былі прапанаваны шляхі выхаду з сітуацыі, сярод якіх на першым месцы — фарміраванне рамонтных цялушак у асобныя групы па ўзросту і вагавых катэгорыях, а таксама забеспячэнне паўнацэннымі кармамі для атрымання добрых сярэднясутачных прываг. Няварта думаць, што кіраўнікі на месцах не ведаюць гэтых прапісных ісцін. Дык у чым жа тады справа?

Відавочна, у звычайнай недысцыплінаванасці ды аслабленні кантролю з боку старшыняў за работай сваіх спецыялістаў. Ды і сама заатэхнічная служба раёна церпіць ад недахопу кваліфікаваных кадраў. Сёння ў трох сельгасарганізацыях няма галоўных заатэхнікаў, у шасці — заатэхнікаў-селекцыянераў, а вызваленых урачоў-гінеколагаў няма ні ў адной гаспадарцы раёна, за выключэннем Палескай станцыі.

Справядлівасці дзеля варта зазначыць, што для аказання сельгасарганізацыям практычнай дапамогі ў раёне створана спецыяльная група з работнікаў племстанцыі і ветстанцыі. Летась яна 118 разоў выязджала ў гаспадаркі раёна, дапамагаючы тамтэйшым заатэхнікам дыягнаставаць і лячыць хворых жывёлін. Будзе працягнута работа і сёлета. Прычым мяркуецца на новы ўзровень вывесці якасць камп’ютарных праграм племяннога ўліку і кіравання статкам, арганізацыю адбору цялушак ад высокапрадуктыўных кароў, захаваўшы паточна-цэхавую сістэму іх утрымання і асемянення.

СУПРАЦЬСТАЯЦЬ КАВАРНАЙ ХВАРОБЕ

У нашым раёне захоўваецца трывожная сітуацыя з захворваннем на туберкулёз. Расце смяротнасць ад гэтай хваробы. Летась паказчык склаў 8.6 на 100 тысяч насельніцтва (у вобласці — 4.2 на 100 тысяч насельніцтва).

Галоўны ўрач установы аховы здароўя “Лунінецкая ЦРБ” Ігар Невар прааналізаваў ход рэалізацыі ў раёне мерапрыемстваў Дзяржаўнай праграмы “Туберкулёз”. Яе галоўная задача — зніжэнне паказчыка смяротнасці пацыентаў ад туберкулёзу на 1 працэнт у год. І хоць выконваць яе ў поўнай меры пакуль не ўдаецца, дзякуючы праграме стабілізавана сітуацыя з распаўсюджваннем небяспечнай хваробы. Заўважана заканамернае зніжэнне колькасці выпадкаў туберкулёзу сярод так званага “спецкантынгенту”. Разам з тым, непакоіць рост рэцыдыву гэтай хваробы.

Як вядома, першы крок у барацьбе з туберкулёзам — флюараграфічнае абследаванне насельніцтва. Штогод на Лунінеччыне ім ахоплена больш як 98 працэнтаў жыхароў старэй за 17 год. Прыкметна актывізавалася работа з набыццём перасовачнага комплексу “Скрынэкспрэс”. Менавіта гэтым тлумачыцца павелічэнне колькасці выяўленых першасных пацыентаў.

Спыніўся дакладчык на якасці санітарна-асветніцкай работы, узаемадзеянні з іншымі ведамствамі, ад якіх залежыць эфектыўнасць барацьбы з туберкулёзам, а таксама расказаў пра комплекс мерапрыемстваў, які закліканы знізіць захворваемасць і смяротнасць ад гэтай хваробы.

ДРУГАСНАЯ, АЛЕ ВЕЛЬМІ ВАЖНАЯ

Аналіз ходу нарыхтоўкі другасных матэрыяльных рэсурсаў значыцца ў парадку дня кожнага пасяджэння раённага выканаўчага камітэта. Не стала выключэннем і сакавіцкае.

Намеснік старшыні райвыканкама Руслан Хоміч адзначыў, што даведзенае на 2015 год заданне па нарыхтоўцы паперы, шкла і палімерных адходаў размеркавана паміж 116 прадпрыемствамі і арганізацыямі. Аператарамі па збору другаснай сыравіны вызначаны КУШВП ЖКГ “Лунінецкая ЖКГ”, КУШВП ЖКГ “Мікашэвіцкая ЖКГ”, райспажыўтаварыства, ААТ “Брэстаблрэсурсы”. Для раздзельнага збору ЦКА ў раёне абсталяваны 24 пляцоўкі, устаноўлены 72 кантэйнеры. Працуюць 14 комплексных прыёмных пунктаў.

За 2 месяцы года сабрана больш як 100 тон паперы, 182 тоны шкла. Калектывы многіх прадпрыемстваў адказна аднесліся да гэтай справы. Аднак ёсць і тыя, хто ставіць пад пагрозу выкананне заданняў першага квартала. Да іх падыход будзе дастаткова прынцыповым. У сувязі з гэтым гарсельвыканкамам прадпісана праводзіць сістэмную растлумачальную работу з насельніцтвам па пытаннях раздзельнага збору другаснай сыравіны. Камунальныя службы абавязаны павялічыць працэнт сельскіх населеных пунктаў, ахопленых раздзельным зборам ЦКА. Упарадкавана будзе гэтая работа і на палігонах.