Павагу людзей трэба заслужыць
Прямая линия

Павагу людзей трэба заслужыць

кавалевичНа пытанні чытачоў “ЛН” адказвае намеснік старшыні райвыканкама Уладзімір Міхайлавіч КАВАЛЕВІЧ.

Соф’я Курыловіч, Кацярына Максімчык, Велута, вуліца Чорны Брод. Чаму да нашых дамоў №№ 4 і 10 не даязджае машына па збору смецця? Жывем наводшыбе і да прыпынку, дзе спыняецца гэты транспарт, трэба ісці з паўкіламетра, а то і больш. Мы – людзі пажылыя, Кацярына Сяргееўна ўвогуле інвалід. Хто, скажыце, панясе на такую адлегласць адходы? Справімся з імі як-небудзь самі. Раней жа гэтай праблемы не было. Больш таго, калі прапаноўвалі заключыць дагавор, то абяцалі, што ўсё будзе як след. А тут такая “паслуга”… Пісалі заяву, каб скасаваць дагавор, нам адмовілі, ды яшчэ судом прыгразілі. Хіба ж гэта правільна? Мы не супраць плаціць, але толькі за работу, якая выканана, а не так, як робяць камунальнікі – каб толькі спагнаць грошы немаведама за што. Разумеем, што працаваць ім няпроста, але абяцаннямі павагу людзей не заслужыш, яна прыходзіць праз канкрэтныя справы.
– Абяцаю вам, Соф’я Апанасаўна, што абавязкова разбяромся ў вашай праблеме. І калі паслуга і сапраўды не аказваецца, то дагавор будзе скасаваны.
Ад рэдакцыі. Па меркаванню дырэктара КУШВП ЖКГ В.М. Вакульчыка, «цвёрдыя камунальныя адходы з падворкаў жыхароў названай вуліцы збіраюцца з усіх сядзіб без выключэння. Прыпыначныя пункты знахо-дзяцца па дарозе, якая вядзе да міні-палігона в. Велута. У зімовы час здараюцца збоі ў графіку руху спецыяльнага транспарту па прычыне неачышчанай пад’язной дарогі. Гэтую работу павінна выконваць ДРБУ-101».
Між тым, як паведаміў старшыня сельвыканкама Ф.М. Рашэцкі, Васіль Мікалаевіч у чарговы раз прадэманстраваў недасведчанасць у тым, як насамрэч абстаяць справы. Дарога да названых падворкаў была расчышчана ад снегу работнікамі ДРБУ-101 своечасова, аднак спецыяльны транспарт сюды не заходзіў ні летам, ні восенню. Не заходзіць і зараз, хоць дагаворы з жыхарамі заключаны, і ўсе плацяжы яны робяць спраўна. Адлегласць ад гэтых дамоў да прыпынку, які назваў В.М. Вакульчык, ад аднаго дома 500, ад другога – 700 метраў. І можна зразумець людзей, якія адмаўляюцца ў такую далячынь насіць смецце. Куды прасцей яго спаліць ці закапаць, тым больш што адходаў няшмат. Як высветлілася, заезд да названых дамоў наогул не запланаваны ў камунальным графіку, хоць усе ўмовы для гэтага ёсць, у тым ліку і разварот для спецыяльнага транспарту. Як запэўніў кіраўнік вясковай “вертыкалі”, па запатрабаванню сельвыканкама ў бліжэйшы час адбудзецца сустрэча прадстаўніка камунальнай службы з жыхарамі названых дамоў. Калі не будзе прынята станоўчае рашэнне аб уключэнні сядзіб у графік руху спецыяльнага транспарту, Фёдар Міхайлавіч паабяцаў таксама падтрымаць рашэнне людзей і настойваць на тым, каб скасаваць дагаворы, паслуга па якіх не прадастаўляецца.

Алена Якубовіч, Мокрава. 26 студзеня заказала балон са звадкаваным газам. Развозілі яго ў нашай вёсцы 29-га, але мне чамусьці не даставілі…
– Алена Мікалаеўна, газ вам будзе дастаўлены заўтра ж (“Прамая лінія” праходзіла 30.01.2014 – Т.В.). Збой адбыўся з-за павелічэння колькасці заявак на дастаўку балонаў і нечаканай паломкі тэхнікі.
Як паведаміў дырэктар РВУ “Лунінецрайгаз” В.І. Сыцэвіч, звадкаванае паліва па названым адрасе дастаўлена 31.01.2014.

З Бастыні тэлефаную, але думаю, што гэтае пытанне цікавіць і жыхароў іншых населеных пунктаў. Скажыце, калі ласка, ці ёсць у раёне брыгада па адлову бадзячых сабак? Працуе яна ў гарадах ці таксама ў сельскіх населеных пунктах? Як можна выклікаць гэтых спецыялістаў у нашу і суседнія вёскі сельсавета? Ад бадзячых жывёлін хутка жыцця не будзе, тым больш, што вясна не за гарамі…
(Падобныя пытанні паступілі з в. Вялікія Чучавічы і г. Мікашэвічы – Т.В.).
– Такая брыгада ў КУШВП ЖКГ “Лунінецкая ЖКГ” ёсць. Высветлім умовы яе работы.
Як паведаміў дырэктар КУШВП ЖКГ “Лунінецкая ЖКГ” В.М. Вакульчык, згодна з пастановай Савета Міністраў Рэспублікі Беларусь ад 04.06.2001 года №834 “Аб зацвярджэнні Правілаў утрымання дамашніх сабак, катоў, а таксама адлову безнаглядных жывёлін у населеных пунктах Рэспублікі Беларусь” і пастановай Міністэрства жыллёва-камунальнай гаспадаркі Рэспублікі Беларусь ад 29.12.2001 года №23 “Аб зацвярджэнні Палажэння аб парадку дзейнасці арганізацый па адлову, адстрэлу, утрыманню і эўтаназіі безнаглядных жывёлін у Рэспубліцы Беларусь” у мэтах своечасовай барацьбы з бадзячымі жывёлінамі жыллёва-камунальнай гаспадарцы даручана ў выключных выпадках праводзіць адстрэл безнаглядных жывёлін у г. Лунінцы з 3 гадзін ночы да 6 гадзін раніцы, у сельскіх населеных пунктах – па заяўках сельвыканкамаў.
Для рацыянальнага абслугоў-вання камунальнай уласнасці за Лунінецкай ЖКГ замацаваны Лунінскі, Дзятлавіцкі, Чучавіцкі, Дварэцкі, Вулькаўскі, Бастынскі, Багданаўскі і Гарадоцкі сельсаветы, за Мікашэвіцкай – Рэдзігераўскі, Лахвенскі, Сінкевіцкі сельсаветы і Мікашэвіцкі гарвыканкам.
Зараз ідзе работа па ўкамплектаванню брыгады па адлову безнаглядных жывёлін. Для яе выкліку ў вёскі раёна старшыням сельвыканкамаў трэба заключыць дагавор з жыллёва-камунальнай гаспадаркай на аказанне названай паслугі.
(Застаецца толькі здзіўляцца, ці не занадта зацягнуўся перыяд “укамплектавання брыгады” – 12 год! – Т.В.).

Вольга Кіндрук, Лунінец. Чаму гарадскі транспарт у нашым горадзе ходзіць са спазненнем, абсалютна не прытрымліваючыся графіка руху, пазначанага на прыпыначных шыльдах? Людзі спазняюцца на работу, не паспяваюць да адпраўлення цягнікоў… А калі выказваеш сваю незадаволенасць, то ў адказ ад кандуктара можна пачуць толькі грубасць. Ды і ўвогуле большасць з іх асаблівай ветлівасцю не вызначаюцца.
– Збой у графіку руху гарадскіх аўтобусаў назіраўся ў дні, калі тэмпература паветра вагалася ў межах мінус 20 градусаў. Так, 28 студзеня па прычыне перамярзання паліва былі сарваны рэйсы маршрута №1, адпраўленнем з чыгуначнага вакзала ў 7.25 і 8.40. Рэзервовых аўтобусаў у гэты дзень не было: усе іх задзейнічалі на вывазе школь-нікаў на аздараўленне. У наступныя дні парушэнняў графіка руху гарадскога транспарту не назіралася. Што датычыць кандуктараў, то з імі, запэўніў дырэктар філіяла ААТ “Брэстаблаўта-транс” “Аўтамабільны парк №10” С.М. Кіндрук, праведзена растлумачальная работа аб недапушчэнні грубасці ў адносінах да пасажыраў. Разам кіраўнік прыносіць вам і іншым людзям свае прабачэнні.

Міхаіл Зіміч, Кажан-Гарадок. Уладзімір Міхайлавіч, растлумачце, калі ласка, якая перспектыва газіфікацыі дамоў, што не трапілі ў першапачатковы спіс пры падвядзенні “блакітнага паліва”? Такіх у нашай вёсцы нябярэцца каля трох дзясяткаў. Асабіста я купіў дом пасля таго, як былі завершаны асноўныя работы па пракладцы газаправода.
– У сувязі з тым, што пры распрацоўцы праектна-каштарыснай дакументацыі на асобныя індывідуальныя жылыя дамы адсутнічалі праваўстанаўліваючыя дакументы, у некаторых будынках ніхто не жыў, а на іншыя проста нельга было знайсці гаспадароў, мантаж унутрыдамавых сістэм газазабеспячэння тут не праводзіўся. Такіх сядзіб у Кажан-Гарадку 58. Зараз распрацавана праектна-каштарысная дакументацыя на іх газіфікацыю і аблвыканкамам разглядаецца пытанне па вызначэнню крыніцы фінансавання ўсіх работ.



Кнопка «Наверх»
Закрыть
Закрыть