Общество
ВУЧЫЦЬ ПРЫСТАСОЎВАЦЦА ДА ЖЫЦЦЯ
Жнівеньскую педагагічную нараду сёлета прымала Міжлеская СШ – пераможца раённага конкурсу па падрыхтоўцы ўстаноў адукацыі да новага навучальнага года.
У тым, што перамога заслужаная, змог упэўніцца кожны з удзельнікаў мерапрыемства. Вялікая тэрыторыя вакол навучальнай установы ўяўляе сабой узор дагледжанасці. Парадак – у самім будынку, святочны выгляд якому надалі ўпрыгожанні з паветраных шароў і выстава кветак. Сёлета яна размясцілася не ў фае, а на залітай сонцам пляцоўцы непасрэдна перад школай. А яшчэ да ўвагі запрошаных на нараду была прадстаўлена выстава метадычных напрацовак педагагічных калектываў і вырабаў з прыродных матэрыялаў. Святочныя экспазіцыі з цікавасцю наведалі госці, сярод якіх былі старшыня райвыканкама Васіль Агіевіч і яго намеснік Віктар Рафаловіч.
Па традыцыі жнівеньскі педагагічны савет адкрывала ўшанаванне маладых спецыялістаў. Наказ на дарогу маладым прагучаў з вуснаў настаўніцы замежнай мовы СШ №2 г. Лунінца Ганны Назаранка. Слова ў адказ трымала выпускніца педуніверсітэта імя Максіма Танка Варвара Сініцкая. 1 верасня яна сустрэнецца са сваімі вучнямі – першакласнікамі лунінецкай СШ №4.
«Якасць адукацыі як фактар і ўмова сацыялізацыі асобы” – такой была тэма выступлення начальніка раа Валянціны Верас. Валянціна Ігнатаўна падрабязна расказала пра набыткі, з якімі адукацыя раёна прыйшла да новага навучальнага года і пра тое, што робіцца настаўнікамі для развіцця ў вучняў актыўнасці, мэтанакіраванасці, ініцыятыўнасці і творчасці – якасцей, якія дапамагаюць прыстасоўвацца да зменлівага жыцця.
Назваўшы дашкольную адукацыю галоўным рэзервам, які вызначае поспех дзіцяці ў школе, дакладчык падкрэсліла, што ва ўсіх 37 дзіцячых установах падобнага кшталту працуюць педагогі-прафесіяналы. Зараз намаганні скіраваны на тое, каб пераважная боьшасць іх мелі вышэйшую адукацыю. Вялікая ўвага надаецца ўкараненню здароўезберагаючых тэхналогій. У ліку праблем, якія сёння хвалююць найбольш, быў адзначаны недахоп месцаў у дзіцячых садах, асабліва ў Лунінцы і Мікашэвічах. Сітуацыю выправіць мяркуецца з дапамогай павелічэння напаўняльнасці груп і вываду з садкоў першых класаў.
Маніторынг якасці адукацыі дазволіў убачыць станоўчую дынаміку вынікаў дзейнасці ўсіх агульнаадукацыйных школ раёна. Пацверджаннем гэтаму факт, што больш як 60 працэнтаў выпускнікоў паказалі высокі і дастатковы ўзровень ведаў. Амаль 43 працэнты іх паступілі ў ВНУ. Па-ранейшаму планку першынства ўтрымліваюць ліцэй і гімназія імя Уладзіслава Нядзведскага – 95,5 працэнта. Сярод вясковых школ на першым месцы Дубаўская – 75 працэнтаў школьнікаў сталі студэнтамі. У разрэзе гарадскіх школ недасягальным для многіх стаў паказчык паступальнасці ў СШ №4 г. Лунінца – 67,4 працэнта.
Адначасова Валянціна Ігнатаўна падкрэсліла, што ў далейшым якасць адукацыі будзе ацэньвацца не толькі па колькасці паступіўшых у ВНУ выпускнікоў, а па іх прыстасаванасці да жыцця і ўменню адаптавацца ў ім. Па зразумелых прычынах асабліва неабходная гэтая якасць для дзетак-інвалідаў. Сёння спецыяльную адукацыю атрымліваюць 587 дзяцей з асаблівасцямі псіхафізічнага развіцця. Дагэтуль адчуваецца недахоп кваліфікаваных кадраў у класах інтэгрыраванага навучання, асабліва ў вёсках.
Падрабязна быў прааналізаваны стан выхаваўчай работы. Сярод яе недахопаў – рост падлеткавай злачыннасці ў 2011 годзе. Зразумела, што зараз трэба шукаць новыя эфектыўныя метады ўплыву на асобу такіх дзяцей з тым, каб дапамагчы ім змяніць паводзіны.
Прагучала на нарадзе запэўніванне, што і надалей сістэме адукацыі з боку раённых улад будзе ўдзяляцца самая пільная ўвага, у тым ліку і ў напрамку ўмацавання матэрыяльна-тэхнічнай базы. Яскравае пацверджанне гэтаму – пачатак будаўніцтва новай школы ў Вульцы 2 і прыбудовы да лунінецкай СШ №1.
«Галоўнай кузняй кадраў” і «ўвасабленнем усяго лепшага на зямлі” назваў школы Лунінеччыны старшыня райвыканкама Васіль Агіевіч. Невыпадкова сёння галоўнае патрабаванне да настаўнікаў – дапамагчы вучню своечасова вызначыцца з прафесіяй. І пры гэтым абавязкова ўлічыць сацыяльны заказ, арыентуючы выпускнікоў на набыццё спецыяльнасцей, запатрабаваных грамадствам.
Ісці ў нагу з часам заклікае настаўнікаў і тэхнічны прагрэс. Васіль Міхайлавіч выказаў пажаданне не толькі развіваць у вучня цікавасць да ведаў, але і разумна выкарыстоўваць інтэрнет-рэсурс. Менавіта педагогі павінны вучыць разбірацца ў шматлікіх, іншы раз не адпавядаючых рэчаіснасці звестках і закліках, якія прапаноўваюць так званыя сацыяльныя сеткі.
З віншаваннямі да калег звярнулася старшыня райкама прафсаюза работнікаў адукацыі і навукі Нэла Рафаловіч. Яна ж уручыла Граматы райкама лепшым прафсаюзным лідэрам адукацыйных устаноў. Цёплыя словы адрасавала настаўнікам і галоўны рэдактар «Лунінецкіх навін” Таццяна Вайцяхоўская.
У наступным абмене думкамі ўдзельнічалі загадчыца ясляў-сада №10 г. Лунінца Любоў Шкабара, дырэктар ліцэя Мікалай Паўловіч, намеснік дырэктара па вучэбнай рабоце гімназіі імя Уладзіслава Нядзведскага Лідзія Кіслюк, намеснік дырэктара па выхаваўчай рабоце Лунінскай СШ Мікалай Аляксееў, настаўніца рускай мовы і літаратуры Люшчанскай яслі-сад-базавай школы Галіна Профіт, настаўніца пачатковых класаў Вялікачучавіцкай СШ Галіна Грыцкевіч і загадчыца аддзела гігіены і эпідэміялогіі РЦГіЭ Людміла Мароз.
Заключным акордам мерапрыемства стала творчая справаздача Міжлескай СШ. Падрыхтаваны вясковымі настаўнікамі канцэрт многія ўспрынялі як натхняльную нотку на наступныя высакародныя справы.
Таццяна ПЯТРОВА. Фота аўтара.