70 год ПерамогіПрисяга

“Я согласен на медаль…”

Жартаўлівыя радкі Васіля Цёркіна прыгадаліся, калі, удакладняючы інфармацыю па загінуўшых воінах, на сайце “Подвиг народа” знайшла звесткі аб узнагароджаннях людзей, маючых дачыненне да нашага краю.

У ліку чырвонаармейцаў-вызваліцеляў, якія навечна засталіся ў брацкіх магілах, ёсць і малодшы сяржант Іосіф Ігнатавіч Разанцаў. Ураджэнец Арлоўскай вобласці служыў сапёрам. 20 жніўня 1943 года быў адзначаны медалём “За баявыя заслугі”. У прадстаўленні да ўзнагароды ўказана: “Асабіста сам размініраваў і абяс-шкодзіў 11 асколачных процітанкавых мін праціўніка ў раёне прасоўвання палка, чым забяспечыў бесперашкоднае прасоўванне палка для выканання баявой задачы без страт”.

Яшчэ амаль год наканавана было служыць байцу з вельмі небяспечнай воінскай спецыяльнасцю. 8 ліпеня 1944 года пры вызваленні нашага раёна 36-гадовы Іосіф Разанцаў загінуў. Пахаваны ў брацкай магіле ў Лахве…

Прыкладна ў гэты ж час у Чырвоную Армію прызвалі ўраджэнца гэтай вёскі. Іван Андрэевіч Лусевіч, годна выконваў ратны абавязак, аб чым сведчыць прадстаўленне да ўзнагароды, згодна з якім “у баі 2 лютага 1945 года ў раёне в. Руты, будучы сувязным ад каманднага пункта да агнявых пазіцый, своечасова дастаўляў загады і адначасова ліквідаваў 9 парываў ліній сувязі”. Загадам Вярхоўнага Галоўнакамандуючага салдат адзначаны медалём “За адвагу”. Цікава, ці атрымаў узнагароду? Ці паспеў панасіць на гімнасцёрцы? 18 сакавіка Іван Лусевіч загінуў. Пахаваны ў Латвіі.

Жыхары Лахвы па праву могуць ганарыцца сваім земляком. Хочацца спадзявацца, што вучні мясцовай школы зоймуцца пошукам звестак пра загінуўшых і пайшоўшых з жыцця ўдзельнікаў Вялікай Айчыннай, каб памяць аб іх перадаць наступным пакаленням.

Таццяна КАНАПАЦКАЯ.

Показать больше

Похожие статьи

Кнопка «Наверх»
Закрыть
Закрыть