Спорт

Галоўны трэнер нацыянальнай зборнай Бернд ШТАНГЕ: “ЦЯПЕР Я ВЕДАЮ, ШТО ТАКОЕ “ГРАНІТ”…”

Слова “Граніт” вядомы спартыўны функцыянер ужыў як у прамым, так і ў пераносным сэнсе, маючы на ўвазе футбольны клуб з аднайменнай назвай пасля яго гульні з фаварытам сёлетняга чэмпіянату барысаўскай камандай “БАТЭ”. 

У спартыўных колах ніхто, бадай, не чакаў, што пераможнае шэсце лідэра і чэмпіёна спыніць каманда, якая сёлета замацавалася “ў хвасце” турнірнай табліцы. Аднак вельмі прыемна, што менавіта нашы землякі зноў аказаліся не “па зубах” славутаму клубу: летась каманда братоў Бахно двойчы ўнічыю згуляла з “БАТЭ”, а сёлета зноў пацвердзіла статус непераможных для барысаўчан сапернікаў.

Нягледзячы на тое, што вароты “Граніта” былі “распячатаны” на першай хвіліне (гол з варатарскай лініі галавой забіў Скавыш), гульня не згубіла сваёй вастрыні. “Граніт” не хацеў здавацца, а гаспадары, раз за разам ствараючы галявыя сітуацыі каля варот саперніка, імкнуліся павялічыць разрыў. Аднак штораз на месцы аказваўся Панкратаў, дарэчы, экс-барысаўчанін. 

Пасля перапынку “БАТЭ” працягваў атакаваць вароты “Граніта”, але безвынікова. А вось нашы землякі ўдала скарысталі вуглавы каля варот саперніка: Булойчык з блізкай адлегласці без промаху адправіў мяч у сетку барысаўчан.

У выніку нічыёй – 1:1 – “БАТЭ” спыніў пераможную серыю гульняў, а “Граніт” замацаваўся на 12-ым радку турнірнай табліцы.
Нягледзячы на зразумелае расчараванне тамтэйшых балельшчыкаў (іх у сярэднім на барысаўскім стадыёне збіраецца да 5000), яны апладысментамі праводзілі футбалістаў “Граніта”. А галоўны трэнер нацыянальнай зборнай Бернд Штанге пасля матча асабіста павіншаваў кожнага з нашых футбалістаў-землякоў, сказаўшы знамянальную фразу: “Цяпер я ведаю, што такое “Граніт”…”

23 мая, у суботу, у нашых балельшчыкаў будзе выдатная магчымасць падтрымаць землякоў. На гарадскім стадыёне “Палессе” адбудзецца матч 9-га тура Чэмпіянату краіны па футболе з удзелам каманд “Граніт” (Мікашэвічы) і “Нёман” (Гродна).

Пачатак гульні ў 17 гадзін. Набыць білеты можна ў касах стадыёна з 8 да 19 гадзін.


Показать больше

Похожие статьи

Кнопка «Наверх»
Закрыть
Закрыть