Спорт

КРОС АДКРЫВАЕ ЛЁГКААТЛЕТЫЧНЫ СЕЗОН

Дождж, што прайшоў напярэдадні правядзення першынства раёна па кросе, асвяжыў паветра сасновага бору. Арганізатары, настаўнікі фізкультуры гарадскога ліцэя і вучні навучальнай установы паклапаціліся, каб прывесці тэрыторыю ў парадак і абазначыць трасу.

Да месца збору прыбылі каманды 31 агульнаадукацыйнай і 6 базавых школ раёна. Удзельнікаў спаборніцтваў віталі начальнік аддзела па фізічнай культуры, спорту і турызме райвыканкама Аляксандр Рамановіч і дырэктар ДЮСШ Валерый Жукоўскі. Права падняць Дзяржаўны флаг прадаставілі пераможцы рэспубліканскіх спаборніцтваў Крысціне Зіновік.

Першай сярод дзяўчынак 1994-95 гадоў нараджэння кіламетровую дыстанцыю пераадолела Таццяна Кіндрук з лунінецкай СШ №2. Разам з ёй на п’едэстал падняліся Ганна Косач з Дзятлавіцкай СШ і Вераніка Юрэвіч з Сінкевіцкай СШ. Юнакі гэтага ж узросту змагаліся на дыстанцыі ў два разы даўжэй. Тут не было роўных Максіму Наварычу з Лунінскай СШ. Другое месца заняў Алег Гурбановіч (СШ №1 г. Мікашэвічы), трэцяе – Антон Турчыновіч з Лахвы.

У дзяўчынак 1992-93 года нараджэння з вялікім адрывам ад саперніц на двухкіламетровай дыстанцыі фінішавала Крысціна Зіновік з Дзятлавіч. Эльвіра Міцура з мікашэвіцкай СШ № 1 паказала другі вынік, а ліцэістка Кацярына Макоўская – трэці. Непрадказальным аказаўся забег на 3 кіламетры сярод юнакоў. Дружна адзначыліся на фінішы Сяргей Караваевіч з Кажан-Гарадка, Міхаіл Шабан з мікашэвіцкай СШ №1, Віктар Клімчук з Вялуцкай СШ. У такім ж парадку яны падняліся на п’едэстал.

Што датычыць каманднага першынства, то тут трэба адзначыць паспяховасць мікашэвіцкай СШ №1, якая стала пераможцай. Як адзначае настаўнік фізкультуры Мікалай Клеўжыц, галоўнае – паставіць мэту і стабільна працаваць у гэтым напрамку. Так працуюць і ў Дзятлавіцкай СШ Уладзімір Кацуба і Віктар Канапацкі, а таксама трэнер Алена Хадненка. Гэта школа набрала другую суму балаў. Трэцяй стала Кажан-Гарадоцкая СШ на чале з Аляксеем Веляскевічам.

Сумна, але ў прызёры не трапіла ніводная лунінецкага гарадская школа. Ліцэй заняў чацвёртае месца. Каманда СШ №3 наогул прыбыла, калі стартавалі першыя забегі, а форма ўдзельнікаў прыводзіла ў недаўменне – джынсы. Адсюль і вынік – апошняе месца.

Сярод базавых школ перамагла Ракітнянская. Другое месца – у Азярніцкай, трэцяе – у Люшчанскай.

Заканчэнне дзіцячых спаборніцтваў адзначана масавым стартам на прызы газеты “СБ”. Абсалютна лепшы вынік паказаў Рыгор Шуляк. У сваіх узроставых катэгорыях пераможцамі таксама сталі Аляксандр Мірановіч, Сяргей Яраховіч, Алена Мурашкевіч і Алена Даніловіч. Усе адзначаны граматамі аддзела па фізічнай культуры, спорту і турызме райвыканкама і прэміямі ад РФСК “Здароўе”.



Показать больше

Похожие статьи

Кнопка «Наверх»
Закрыть
Закрыть