НЕПРАХОДНАЯ АБАРОНА ГАРНЯКОЎ

Для мікашэвіцкага “Граніта” барацьба за Кубак Беларусі спынілася на ¼ фіналу.

Па суме двух паядынкаў салігорскі “Шахцёр” аказаўся мацнейшы. Нягледзячы на тое, што пасля першага матча салігорцы мелі даволі сур’ёзную перавагу – 2:0, яны не збіраліся ў Пінску гуляць на ўтрыманне ліку. Аб гэтым нагадвалі вострыя атакі на вароты Парэчына з першых хвілін паўторнай гульні. “Граніту” ўдалося стрымаць націск саперніка на працягу ўсяго першага тайма, і нават стварыць некалькі небяспечных сітуацый.

Другая ж палова сустрэчы паставіла кропкі над “і”. Праз 40 секунд пасля перапынку “Шахцёр” павёў у ліку. Яшчэ праз 10 хвілін на табло было ўжо – 2:0 на карысць гарнякоў. “Граніт” так і не здолеў знайсці ў гэтым матчы сваю гульню, у той час сапернікі нарошчвалі перавагу, якая вылілася яшчэ ў адзін мяч, забіты на перадапошняй хвіліне.