ПЕРШАЕ ПАРАЖЭННЕ НА “ПАЛЕССІ”
Выпрабаванне спякотай “Граніт” і яго сапернікі ўжо трымалі на новым стадыёне “Палессе”, называючы сінтэтычнае пакрыццё “смажня” і “лазня”. У гульні з “Нафтанам”, якая адбылася ў мінулую суботу, давялося зведаць “смак” ліўневай непагадзі.
Умовы не самыя лёгкія: з-за дажджу абмяжоўвалася бачнасць, а мокры мяч не заўсёды ляцеў у патрэбным напрамку. Нечакана, здавалася б, у зусім радавым эпізодзе абаронца “гранітаўцаў” Валерый Тарасенка атрымаў траўму і вымушаны быў пакінуць поле. Гэта не лепшым чынам адбілася на далейшай гульні нашых землякоў. У другой палове сустрэчы яны сталі прытрымлівацца абараняльнай тактыкі, тым самым прадаставіўшы шанц сапернікам гуляць больш камбінацыйна і вынікова. На 59-ай і 77-ай хвілінах іх атакі завяршыліся галамі. 0:2 – першае паражэнне “Граніта” на лунінецкім стадыёне.
