Спорт

ТРЫА ПЕРАМОЖЦАЎ

Стралковы гурток у лунінецкай СШ № 2 карыстаецца асаблівай папулярнасцю. Справа ў тым, што яго наведвальнікі неаднаразова станавіліся пераможцамі раённых і абласных спаборніцтваў. Днямі каманда школы, якая нядаўна стала пераможцай раённых спаборніцтваў, вярнулася з вышэйшай узнагародай з абласнога першынства ДТСААФ.

Як паведаміў кіраўнік гуртка Віктар Вайцяхоўскі, поспех нельга назваць выпадковасцю. Да гэтай узнагароды яго выхаванцы рыхтаваліся мэтанакіравана, адшліфоўваючы навыкі пастаяннымі трэніроўкамі.

Максім Кавалевіч (на здымку злева) некалькі год таму з зайздрасцю глядзеў на юнакоў, якія з вінтоўкамі ішлі ў стралковы цір. Пазней запісаўся ў гурток сам. З кожнай трэніроўкай было бачна, што ёсць у хлопца не толькі цярпенне і зоркае вока, але і імкненне перамагаць. І вось ужо два гады Максім лічыцца лепшым стралком раёна. Крыху пазней да заняткаў далучыліся Ганна Даніловіч і Аляксандр Аляшкевіч. Абодвух да паходаў у цір прыахвоцілі сябры. Першы ўдзел у спаборніцтвах адразу прынёс перамогу Ганне, якая настолькі зацікавілася гэтым відам спорту, што нават не ўяўляе, як можна прапускаць трэніровачныя заняткі. Тым больш ёй цяпер зайздросцяць многія юнакі. На раённых спаборніцтвах яна ўсё часцей паказвае вынік лепшы, чым у прадстаўнікоў моцнага полу. Аляксандр Аляшкевіч таксама вызначаецца трапнасцю і імкнецца не падводзіць каманду ў адказны момант.

Стаўшы летась пераможцамі Кубка МРАС ДТСААФ і абласнога Кубка ДТСААФ, усе трое разумелі, што горш выступіць на першынстве вобласці не маюць права. Максім Кавалевіч крыху разгубіўся пры стральбе па першай мішэні, аднак хутка здолеў настроіцца на барацьбу і не пакінуў сапернікам шанцаў на перамогу. Не стаў адставаць ад калегі па камандзе Аляксандр Аляшкевіч, уступіўшы толькі 7 ачкоў, што забяспечыла другое месца ў асабістым заліку. Ганна Даніловіч стала бронзавым прызёрам спаборніцтваў.

У агульнакамандным заліку лунінчанам не было роўных.

Віншуем спартсменаў і іх трэнера з заслужанай перамогай!



Показать больше

Похожие статьи

Кнопка «Наверх»
Закрыть
Закрыть