Спорт
ВЫНІК ВЫЗНАЧЫЎ ПЕНАЛЬЦІ
Футбол
За два туры да заканчэння чэмпіянату краіны па футболе ў першай лізе мікашэвіцкі “Граніт” захоўвае пазіцыі на дзевятым радку турнірнай табліцы.
Сем каманд, якія знаходзяцца ніжэй, ужо не змогуць апярэдзіць нашых землякоў, а вось у “гранітаўцаў” ёсць шанц падняцца вышэй. Але для гэтага ім трэба пастарацца.
У дамашнім матчы з пінскай “Хваляй” мікашэвіцкія футбалісты так і не змаглі “распячатаць” вароты гасцей. Пінчанам жа падфарціла: за парушэнне гаспадароў у штрафной пляцоўцы яны зарабілі 11-метровы, які паспяхова рэалізаваў Юрый Каралюк. Лік 0:1 захаваўся да канца гульні.
12 лістапада, у суботу, “Граніт” сустрэнецца на выездзе з суседам па турнірнай табліцы “Клечэскам”.
Міні-футбол
ПАРАДАВАЎ БАЛЕЛЬШЧЫКАЎ
На мінулым тыдні ў рамках чэмпіянату краіны па міні-футболе “Граніт” прымаў дэбютанта вышэйшай лігі баранавіцкую каманду “Гаспадар”.
Няпроста складваўся пачатак сустрэчы. Госці адкрылі лік на другой хвіліне. А на 8-ай Алег Міхнюк не рэалізаваў пенальці: варатар згуляў надзейна. Сканцэнтраваўшыся, “гранітаўцы” ўсё ж знайшлі сваю гульню і выйгралі паядынак з лікам 5:4. У мікашэвіцкай камандзе вызначыліся Аляксей Шаўчэнка (2), Аляксандр Самусевіч (2) і Дзмітрый Скакалкін.
13 лістапада, у нядзелю, “Граніт” згуляе на выездзе з “Кіраўскам-Белшынай”, а “Базар” дома з “БТЭУ”.
