«Першая ластаўка»
У Мікашэвічах у канцы мінулага тыдня адкрыўся спартыўна-забаўляльны комплекс. Ён уключае ў сябе пляцоўку вулічных трэнажораў, дзіцячы гульнявы гарадок і міні-парк. Ініцыятарам стварэння, а таксама распрацоўшчыкам, рэалізатарам і фундатарам гэтага выдатнага праекта стаў працоўны калектыў РУВП «Граніт» на чале з генеральным дырэктарам Эдуардам Гаўрылковічам.
Каб у невялікай святочнай цырымоніі змагло ўдзельнічаць як мага больш людзей, урачыстае адкрыццё новага месца актыўнага адпачынку для жыхароў і гасцей Мікашэвіч было свядома запланавана на канец працоўнага дня. Зрэшты, першыя наведвальнікі каля Палаца культуры РУВП «Граніт» з’явіліся значна раней прызначанага часу. Дзетвара з радасцю і запалам знаёмілася з разнастайнымі элементамі гульнявога гарадка, дарослыя хадзілі вакол пляцоўкі з вулічнымі трэнажорамі, новымі арэлямі і арыгінальнымі шырокімі лаўкамі пад навесамі з полікарбанату.
На святочны лад настройвала музыка і рознакаляровыя гірлянды з паветраных шароў, якія ўпрыгожвалі пабудовы новага аб’екта. Са сцягамі – дзяржаўным і сімволікай гранітаздабываючага прадпрыемства – прайшлі футбалісты. Дружнымі апладысментамі падтрымлівалі гледачы выступленне Эрыкі Дземідовіч і выхаванак дзіцячых танцавальных калектываў Палаца культуры.
Са знамянальнай падзеяй землякоў павіншавалі намеснік старшыні райвыканкама Уладзімір Кавалевіч і старшыня раённага Савета дэпутатаў Віктар Рафаловіч. Госці падкрэслілі, што мясцовая ўлада будзе і ў будучым садзейнічаць такім выдатным пачынанням. Генеральны дырэктар РУВП «Граніт» Эдуард Гаўрылковіч шчыра падзякаваў работнікам прадпрыемства, якія за два месяцы распрацавалі праект, адшукалі і набылі неабходнае абсталяванне і матэрыялы, а затым самастойна пабудавалі гэты ўнікальны комплекс. Дарэчы, па словах кіраўніка, ён не будзе адзіным. У планах на будучы год – працягнуць пачынанне.
Па ўсім перыметры тэрыторыі новабудоўлі агарадзілі ажурнай металічнай сеткай, усталявалі сферычныя люстэркі, сістэму відэаназірання і магутныя сучасныя вулічныя свяцільні, пабудавалі пешаходныя пераходы. Таксама ажыццявілі добраўпарадкаванне з дапамогай камянёў, рознакаляровых тратуараў і разбіўкі газона. Дапаўняе комплекс вялікі банэр з надпісам-матыватарам «Слабыя пачынаюць з панядзелка… Дакажы, што ты моцны! Пачні мяняцца прама цяпер!».