Па выніках цэнтралізаванага экзамену па беларускай мове трое з 18-ці выпускнікоў Вялікачучавіцкай СШ – Мікіта Малыш, Кірыл Гаргун і Ангеліна Шчатко – атрымалі максімальныя 100 балаў. На 98 балаў прайшла такое выпрабаванне іх аднакласніца Ганна Макаед. Варта дадаць, што Мікіта Малыш мае яшчэ адзін вельмі важкі поспех – стаў уладальнікам залатога медаля.

Дасканалыя веды юнакам і дзяўчатам дала іх класны кіраўнік, настаўніца беларускай мовы і літаратуры Валянціна Гаргун. Цікавы стыль выкладання, асабістая ўлюбёнасць у прафесію і багаты вопыт дапамаглі таленавітаму педагогу падабраць ключык да юных сэрцаў, раскрыць перад вучнямі шматграннасць і непаўторнасць школьнага прадмета, каб усебакова захапіць ім.

Валянціна Валер’еўна вырасла ў Баравіках, у школе вучылася добра. Асабліва лёгка даваліся гуманітарныя навукі. На гэта натхнялі кранаючая прыгажосць навакольнай прыроды, мноства прачытаных кніг і непаўторныя ўрокі таленавітай настаўніцы Ніны Андрэеўны Насеня. Але вясковая дзяўчына адразу не рызыкнула паступаць у ВНУ, хоць і марыла стаць паслядоўніцай вопытнага спецыяліста. Яна адвезла дакументы ў педагагічнае вучылішча. Потым амаль 20 год давала веды пачаткоўцам. І ніколькі не шкадуе аб тым перыядзе. На яе вачах дзеткі вучыліся не толькі чытаць і пісаць, яны спасцігалі ад любімай настаўніцы асновы выхавання і атрымлівалі першую ўпэўненасць у сваіх сілах.

Самаўдасканаленне В.В. Гаргун прыйшло разам з дыпломам мовазнаўца 7 год таму. І годны вынік не прымусіў сябе чакаць – дасягненням выпускнікоў з самага аддаленага аграгарадка раёна, дзе няма рэпетытараў, можна па-добраму пазайздросціць.

– Выхоўваць і навучаць трэба з любоўю, важна на ўроках заўсёды быць сумленнай і справядлівай, – упэўнена Валянціна Валер’еўна. – Нашы выпускнікі – усе малайцы. Веды па роднай мове атрымлівалі на ўроках і факультатывах у профільнай групе. Самі прапаноўвалі цікавыя заданні для трэніровак. Калі адчувалася такая захопленасць, душэўны парыў, то не заставалася сумненняў у добрым выніку. На рэпетыцыйным экзамене ў нас таксама быў 100-бальнік, але вырашылі гэты факт не афішыраваць, каб не спалохаць удачу.

– Мы шчыра ганарымся сваімі вучнямі, – задаволена дырэктар Вялікачучавіцкай СШ Ірына Грыцкевіч. – Дзякуй педагогам за стараннасць і самааддачу, бацькам – за разуменне і падтрымку! І нашай адукаванай моладзі дасылаю самыя цёплыя словы віншаванняў і пажаданняў. Вашы веды – асноўны паказчык работы педкалектыву. Мінулагоднія выпускнікі парадавалі паступленнем у ВНУ – 75 працэнтаў ад агульнай колькасці. Цяперашнія замацавалі дасягненні выдатнай здачай экзаменаў і залатым медалём. Няхай жа ўсім пашчасціць якасна прымяніць добрыя веды ў будучыні!

Мікіта Малыш часта выходзіў пераможцам вучэбных алімпіяд, мае шмат дыпломаў за асабістую стараннасць у асваенні розных прадметаў. Акрамя вышэйшай ацэнкі па беларускай мове, у яго заслужаныя 95 балаў на цэнтралізаваным экзамене па матэматыцы.

Кірыл Гаргун заўсёды з’яўляўся ўдзельнікам розных мерапрыемстваў, наведваў секцыі. Аднакласнікі лічаць яго адказным і надзейным таварышам. Ангеліна Шчатко і Ганна Макаед закончылі школу з аднолькавым балам у атэстатах, у асваенні праграмы ішлі на высокім узроўні. Дзяўчаты актыўныя і адказныя. Увогуле, у класе заўсёды існавала атмасфера прыязнасці і добразычлівасці, што і дапамагала ў атрыманні добрых ведаў. 

Часта даводзіцца чуць, што сучасная моладзь мала чым цікавіцца, без меры захоплена інтэрнэтам. Прыклады сёлетніх выпускнікоў пераконваюць у адваротным. Падлеткі са звычайнай вясковай школы прадэманстравалі выдатныя веды. І не толькі ў Чучавічах.

Тры залатыя медалісты і адзін 100-бальны вынік па беларускай мове ёсць у прадстаўнікоў Багданаўскай СШ. Дасягнулі “золата” і максімуму на цэнтралізаваных экзаменах вучні з СШ аг. Вулька 2, Вялуцкай СШ, Дварэцкай СШ і Кажан-Гарадоцкай СШ. А Дар’я Леўшыц з Дзятлавіцкай СШ мае ў суме 200 балаў у сертыфікатах па роднай мове і хіміі.

Гэта сведчыць аб тым, што вынік у першую чаргу залежыць ад стараннасці здольных вучняў, якія з дапамогай мэтанакіраваных настаўнікаў упэўнена пракладваюць свае дарогі ў дарослае самастойнае жыццё.

Марыя ЯРАХОВІЧ.

Далучайцеся да нашага канала ў Telegram