Сёлета ў Лунінецкі дзяржаўны аграрны каледж на ўзровень прафесіянальна-тэхнічнай адукацыі плануецца прыняць 166 чалавек. З іх 136 – на базе 9 класаў, якіх будуць рыхтаваць па трох кваліфікацыях – “Муляр, тынкоўшчык, маляр”; “Электразваршчык ручной зваркі, трактарыст-машыніст, вадзіцель”; “Повар, афіцыянт, агароднік”. На базе 11 класаў навучацца змогуць толькі жадаючыя мець справу з электразваркай і тэхнікай (30 чалавек).

Тыя, хто дакладна вызначыўся з далейшым выбарам, не сталі цягнуць з падачай дакументаў.

Браты Ягор і Станіслаў Радзюкі з Лунінца вырашылі быць вадзіцелямі аўтамабіля. Знаёмства з установай, дзе будзе праходзіць далейшае навучанне, у абодвух пакінула прыемныя ўражанні.

– Вядома, хваляванне ёсць, але гэта часова, – упэўнены юнакі. – Перспектывы тут добрыя, чулі нямала станоўчых водгукаў аб каледжы. Зацікавіў той факт, што атрымаем адразу некалькі спецыяльнасцей. Зараз запатрабаваны не толькі вадзіцелі, але і электразваршчыкі, і механізатары. З працаўладкаваннем, спадзяемся, праблем не будзе.

Нагадваем: прыёмныя камісіі будуць працаваць па 23 жніўня. Усе юнакі і дзяўчаты, якія пакуль не вызначыліся са сваёй будучыняй, могуць звярнуцца за кансультацыяй у навучальныя ўстановы роднага горада – аграрны і політэхнічны каледжы.

Далучайцеся да нашага канала ў Telegram