З пачаткам ацяпляльнага сезона ў раёне праводзіцца месячнік пажарнай бяспекі.

Раніца супрацоўнікаў РАНС пачынаецца з планавых рэйдаў. Задача простая: праверыць, у якіх умовах жывуць сем’і і выхоўваюцца дзеці. Ці адказна ставяцца бацькі да правілаў пажарнай бяспекі? У адзін з дзён наведалі Дварэцкі сельсавет.

Ракітна. У доме па вуліцы Ціхая жыве мнагадзетная сям’я.

– Апавяшчальнікі ў нас ёсць, але, на жаль, не ва ўсіх памяшканнях, – прызнаецца гаспадыня. – У адным няма “сілкавання”. Знялі, каб не “пішчаў” – малога будзіць.

– Апавяшчальнік падаваў знак, што трэба замяніць батарэйку, – растлумачыў старшы інспектар групы прапаганды і навучання Генадзь Кулеш і ўручыў новы прыбор.

Непадалёк у доме, дзе выхоўваюцца трое дзетак, зараз ідзе рамонт. Інспектары звярнулі ўвагу на пячное ацяпленне.

– З надыходам халадоў колькасць “пячных” пажараў павялічваецца. На драўлянай падлозе, перад топкай, неабходна прыбіць металічны ліст. Спыняць паліць печ або грубку пажадана за дзве гадзіны да адыходу да  сну, – раіць намеснік начальніка РАНС Эдуард Санюковіч.

Па дарозе ў цэнтр сельсавета выратавальнікі заўважаюць:

– За 2012 год на Брэстчыне з-за дзіцячага свавольства адбылося 60 пажараў. Двое дзяцей загінулі.  Сёлета на тэрыторыі раёна ахвярамі агню  сталі хлопчык і дзяўчынка 2010 і 2008 гадоў нараджэння. На момант узнікнення ўзгарання брат з  сястрой былі адны.

У доме на адной з  вуліц Дварца засталі маму з малодшай дачушкай. Жанчына адразу ж прызналася, што ў іх усяго адзін апавяшчальнік. Правяраючыя выправілі сітуацыю.

– Мацаваць апавяшчальнік трэба да столі. Дым, перш чым распаўсюдзіцца па пакоі,   спачатку падымаецца ўверх, – гаворыць інспектар Аляксандр Іончыкаў. – Калі столя навясная, прымацуйце да сцяны, але таксама зверху. Усё гэта – базавыя ісціны, якія дарослым паўтараць неяк няёмка. Але – даводзіцца.

У ходзе праверак сур’ёзных небяспечных сітуацый не выяўлена.