Адбылася чарговая сустрэча ў народнай паэтычнай студыі «Муза» пры гарадскім Доме культуры. На гэты раз удзельнікі і госці знаёміліся з талентам нашай зямлячкі Людмілы Андрэеўны Швед, увасобіўшай у сабе шматгранны творчы патэнцыял настаўніцы, педагога-лагапеда, спявячкі з шырокім вакальным дыяпазонам і, нарэшце, адкрыўшай у сабе талент мастачкі з непаўторным жанрам.

Мы, госці, ўвачавідкі прыкмячалі

Вялікі талент сціплае жанчыны,

К таму ж усенародна адзначалі,

Што не прызнаць усё гэта немагчыма.

Чароўны пэндзаль у яе руках,

Ці спрытны рух звычайнага алоўка,

Ствараюць вобразы, якія на вачах

Характары нам адкрываюць лоўка.

Цудоўны жанр мастачкі-педагога

Падкрэслівае моманты, імгненні,

Якія пражыла на міласць бога

На скрыжаваннях лёсу ў цярпенні,

З пяшчотай, з міласэрнасцю вялікай,

Што ўласціва мабыць ёй адной,

Душой багатай і душой адкрытай,

Таленавітай, творчаю душой.

Хай талент твой, шаноўная Людміла,

Пачэснае цяпер займае месца.

Прасвядную ўзгадаваўшы ніву,

Больш расквітнее, шырай разаўецца.

Трэба адзначыць і высокі творчы ўзровень падрыхтоўкі гэтага мерапрыемства кіраўніком «Музы» Галінай Рыгораўнай Абрамчук. Прадстаўляючы кожную карціну мастачкі-дэбютанткі, Галіна( сама таксама піша карціны!),бы прафесійны крытык, па-майстэрску апісвала эмоцыі, якія выклікалі вобразы і партрэты на карцінах. Сама дэбютантка адзначыла, што гэта яе першая выстава карцін, і іх толькі палова  на гэты раз, але абавязкова прэзентуе ў будучым усе свае работы. Вялікую пашану і ўдзячнасць выказвалі мастачцы ўдзельнікі мерапрыемства, чыталі прысвечаныя ёй вершы, здумоўвалі сумеснае супрацоўніцтва ў мінулым, адлюстроўвалі свае ўражанні ў прыгожым памятным сшытку. Творчасць Людмілы Андрэеўны падтрымліваюць сыны, нявесткі, дачка, зяць і  шматлікія ўнукі, якімі вельмі ганарыцца наша таленавітая зямлячка. Сустрэча атрымалася насычаная, душэўная, на высокім узроўні.

Валянціна Трухнова